Omenala Igbo OJI

Ndi be anyi, Oji abaiala. Ka anyi jiri ya bido ubochi tata. Ma na ka anyi na awa, ma na atakwa ya bu Oji, o ga adi mma ka anyi kpaa ihe ole na ole banyere ya. Maka na ndi be anyi si na Oji bu okwu.
Ya mere, na mbu,---

GỊNỊ BỤ ỌJỊ?

Ọjị bụ mkpụrụ osisi na-amị n'ụlọ na-amịkwa n'ọhịa. A na-akụ ya akụ. Ọ na-epukwara onwe ya dịka mkpụrụ osisi ndị ọzọ.

ỌJỊ IGBO

Ọjị na-adịkarị n'uju ọdịda anyanwụ Naijiria, nke a na-akpọ South West; ya bụ ala ndị Yoruba. Oji Igbo na-adị iche n'oji nke ọzọ a na-akpọ ọjị gworo; ya bụ ọjị awụsa nke na-agba sọ ibe abụọ, na-acha ọcha. Ọjị Igbo na-acha uhie uhie. Mana nke na-acha nzu nzu na adanyekwa oge ụfọdụ. A na-akpọ ya ọjị ugo. Ọjị Igbo na-agba site na ibe atọ were rute ibe asaa. Nke gbara atọ bụ Ọjị Ikenga. Nke gbara asaa, a na-egburu ya ọkụkọ, maọbụ kwanyere ya ugwu pụrụ iche.

ỊWA ỌJỊ

Ndi Igbo na-agọ ọjị tupu ha awaa ya. Onye Igbo agọghi Ọji agọ were taa ya amaghị ihe ọ na-eme. Akuku ala Igbo dị iche iche nwere usoro ha si ago Oji. Ụfọdụ na-awa Ọjị n'onye bụkarịsịrị nwata; onye bụkarịsịrị okenye bụ onye ga-agọ ya bụ Ọjị . O nweziri ike nye onye bụ nwata ka o kee Ọjị ebe ahụ. Nwanyị adịghị awa Ọjị n'ala Igbo, ebe nwoke nọ. Nwanyị adịghị etinye aka n'ọkwa Ọjị, maọbụ were Ọjị tupu nwoke. A na-enye nwanyị ọjị n'aka, maọbụ kwe ka o were n'Ọkwa Ọjị oge nwoke niile wechaara.
IHE SO ỌJỊ

Nzu bụ udo. A na-atụpụrụ onye ọbịa nzu iji sị ya udo dịrị gị. A ga-atụ nzu ahụ iji nabata udo ahụ. Ose ọji e gwere egwe, aku ilu, ose ọji, mmịmi,... ihe ndị a bụ ihe ndi e ji ata ọjị. A na-etinyere onye nze egoọjị n'ọkwa Ọjị maka ịsọpụrụ ya n'echichi ya. Ọ bụghị mmadụ ncha ka a na-emere nke a.
USORO IWA Ọjị

Dịka omenala Igbo siri dị, nwoke ọbụla ka ọ dịịrị ịwa Ọjị n'ụtụtụ na be ya, n'agbanyeghi ndị nọ ebe ahụ. Mana mmadụ adịghị awa ọjị na be ndị ọgọ ya. Mmadụ adịghị awa ọjị ebe ndị tọrọ ya nọ, beere sọ ma e nyere ya ike ime nke a. Onye mere nke a e nwere ike daa ya nha, maọbụ jụ ịta ọjị ahụ. Ọ bụrụ na mmadụ dị iche iche, si n'obodo dị iche iche gbakọọ, a na-ajụ ma o nwere onye Ụmụnri nọ, ọ bụrụ na o nwere onye nọ, a na-ahapụrụ ya ọjị ka o buru ụzọ wapụ ọjị. Nke a bụ nsọpụrụ makana ha bu aka ji ọfọ Nri.

Uru Ọji Bara N'ala Igbo.

Ọjị dị nnukwu mkpa n'ọnọdụ onye Igbo. E ji ya egbu ehi oge gboo. E ji ya achu aja. E ji ya eme ọgbụgbandụ. E ji ya egosi ịhụnanya. E ji ya asị mmadụ nnọọ. Ma nke kasị nke bụ na e ji ya enye Chukwu anyị ekele site n'ekpere a na-ekpe. Ịgọ Ọjị bụ ikpe ekpere.

Ngwa, gwa anyi okwu maobu ilu so oji nke i maara. Dika..Onye wetara Oji wetara ndu.

Ya gazie nu.

AbleMoJah® Nigeria.